வரலாற்றின் கணக்குப் புத்தகம்

மஞ்சள் பையில் சுற்றிவைக்கப்பட்டு,
மஞ்சளும், குங்குமம் கலந்து
பெருவிரலில் பாதி
ஆள்காட்டி விரலில் மீதி அள்ளி
அதன் நாலாபுறங்களிலும் தடவப் பட்டிருந்தது…

நான் இந்தப் பூமிக்கு வாடகைக்கு வாழ வந்தபோது யாரோ ஒருவர் அவசரவரசமாக எழுதிய என் வரவு,செலவு கணக்குகளின் வரலாற்றுப் புத்தகம் என அந்த நோட்டுப்புத்தகம் வரலாற்றுப் புத்தகமாக நம்பவைக்கப்பட்டது…

அச்சிறுவதுகளில் என்றாவது ஒருநாள் என்வரலாற்று புத்தகத்தை எனக்கு தொடவும், பார்க்கவும் வாய்ப்பு கிடைக்கும். காரணம் தெரியாத ஓர் ஈர்ப்பு அப்புத்தகத்தைச் சுற்றி மனதில் இருந்து கொண்டே இருக்கும், அந்த நிமிடச் சந்தோசத்திற்காக அப்புத்தகத்தை தொட்டுப் பார்க்கையில் அவ்வயதின் “ரேங்க் கார்டை”ப் பார்ப்பதைப்போல ஏதோவோர் பயம், பரபரப்பு, ஆர்வம் எல்லாம் என்மீது வந்தமர்கிறது. சட்டென புத்தகத்தின் பாதிக்கு மேலான பக்கங்களில் திருப்பி நான் வாழப்போகும் வாழ்கையை கூட தேடிப்பார்த்திட நினைத்தது உண்டு. அச்சிறு வயதில் வண்ணங்களைத் தவிர அந்தப் புத்தகத்தில் ஏதும் புரிந்ததில்லை. அவ்வளவு சீக்கிரம் எந்தக் கஷ்டங்களும் கடந்திட வாய்ப்பளிப்பதேயில்லை.

வருடங்களுக்கு சில வயது
ஆனதிற்குப் பிறகு,
விடுமுறைக்கு வீட்டிற்கு சென்ற எனக்கு, நேற்றைய பகலில் எதேச்சையாக அப்புத்தகம் கண்முன் கிடந்தது,

மீண்டும் அந்த ஒரு நிமிட போலிச் சந்தோசத்திற்காக அந்தப் புத்தகம் என்னைத் திறந்து பார்க்கத் தூண்டிச் சிரிக்கிறது…

இதுபோல எத்தனை எத்தனையோ போலி
ஒரு நிமிடங்களை நான் தவிர்க்க வேண்டி இருக்கிறது.

நினைத்துப் பார்த்தால் இதுபோன்ற போலி நிமிடங்கள் எனது உண்மையான நிமிடங்களை விட அதிகமாக இருக்கிறது.

காதல் கவிஞர்கள் – ஓர் அறிமுகம்

காதல் கவிதை எழுதுபவனாக
இருப்பதன் நன்மைகளை கவிதையாக்குகிறேன்.,

இல்லாத காதலிகள்தான்
இன்னும் இன்னும் காதலிக்கச் சொல்கிறாள்கள்.

பேப்பரோ, பேனாவோ
அதீத காதலைச் சலித்துக் கொள்வதில்லை.

இவன் காதல் காகிதங்களை மட்டும்
காயப்படுத்துகின்றன.

எல்லோருக்கும் சேர்த்து இவன் காதலித்துக் கொண்டிருப்பான்.

முன்னனுபவம் இல்லாத
இவன் காதல் கவிதைகள்
அன்பில் தொடங்கி அன்பிலேயே முடிகின்றன.

கவிஞனின் காதல் தவறுகள் கவிதைகளிலேயே கண்டுபிடித்து திருத்தப்படுகின்றன.

ஆனால் என்ன அவன் மீண்டும் மீண்டும் ஏதாவது ஒரு தவறைச் செய்துகொண்டே தான் இருக்கப்போகிறான்.

காதல் கவிதை எழுதுபவனாக
இருப்பதன் கஷ்டங்களை
அடுத்த புத்தகமாக எழுதுகிறேன்…!

அவசரம், இக்கவிதை தடைசெய்யப்பட உள்ளது

தடைசெய்யப்பட உள்ள ஓர் கவிதையை
நீங்கள் படித்துக் கொண்டிருக்கிறீர்கள்.,

எழுதியவன்
இரண்டாம் முறை படித்துப்பார்த்து
இதைக் கிழித்தழிக்கும் முன் நீங்கள் இதைப் படித்துவிடுங்கள்…

இதை எழுதியவன் இச்சிறு வேளையில்.,

அவனுக்கில்லாத காதலிக்கு, காதல் மொழி எழுதிக் கொண்டிருக்கலாம்…,

அவனுக்கில்லாத வருத்தத்திற்கு, வருந்திக் கொண்டிருக்கலாம்…,

அவனின் வருத்தங்களைச் சொல்ல
அழகிய வார்த்தைகளைத் தேடிக் கொண்டிருக்கலாம்…,

அடைமழையின் ஊடே கவிதைகளும் விழுந்திருக்குமா எனவெண்ணி புதுக்கவிதை தேடிக் கொண்டிருக்கலாம்…,

முன்பின் தெரியாத மனங்களின் இடையில் அவன் மனம் நசுங்கிக் கொண்டிருக்கலாம்…,

தெருவோரப் பூச்செடி பூவின் இதழோரம் அவன் இரசித்துக் கொண்டிருக்கலாம்…,

இரவுகளில் அவனை மூழ்கடித்துக் கொண்டிருக்கலாம்…,

ஆயிரம் வரிப் பொய்களின் நடுவே அவனின் அரைவரி உண்மையை அவனுக்கும் தெரியாமல் மறைத்து வைத்துக் கொண்டிருக்கலாம்…,
அவனுக்கு சுயநினைவு வரும்வரை இக்கவிதை இங்கேயே இருக்கும், அதற்குள் படித்துவிடுங்கள் அவனுக்கும் முன்…

இப்படியும் சில நிமிடங்கள்

எனைத் திருத்தும்
ஒரு கவிதையையோ,
கட்டுரையோ,
புத்தகத்தையோ
படிக்க நேர்கையில் அவ்வளவு பயமாக இருக்கிறது,

இதுவரை நானிருந்தது தவறெனும் உணரும் அந்நிமிடத்தைச் சந்திக்க…

என்னவள் என் புத்தகம் படிக்கையில்

இலக்கணம் மறந்த அக்கனம்…

மெல்லினம் – அவள் விரல் தீண்டிய எழுத்துக்கள்,

வல்லினம் – அவள் விரல் தீண்டா எழுத்துக்கள்,

இடையினம் – அவள் தீம்பார்வை மட்டும் தீண்டிய எழுத்துக்கள்…

Ilakkanam marantha akkanam.,

Melinam : Aval viral theendiya eluthukkal,

Vallinam : Aval viral theendaatha eluthukkal,

Idayinam : Aval theem paarvai theendiya eluthukkal…